Hindi ko maintindihan kung bakit may mga taong mas nanaisin pa munang mapagalitan at pagtaasan ng boses bago gumawa ng tama at intindihan ang sinasabi mo. Ayoko ng sinisigawan kaya nararapat lamang na huwag ko itong gawin sa aking kapwa. Halos maging isang libro na ata ang aking email sa kanila ngunit wala pa ring nangyayari. Paulit-ulit ng paulit-ulit. Ang pisi ng aking pasensya ay umabot na sa Europa ngunit nais pa ata nilang sagarin hanggang sa kalawakan… hanggang sa kawalan.
Nagmatigas na ako at sinabing mauubos ang oras nila at hindi ako aalis hangga’t walang kasunduang nagaganap. Gusto nila kaming pabalikin muli, paghintayin at paasahin ngunit sa tatlong taong aking paghihintay, siguro naman karapatan ko ng humingi ng ilang oras sa kanila para kami’y asikasuhin. Sa wakas, binigay rin sa amin ang Letter of Acceptance at nagkasundo na kailangan matapos ang aming unit sa May 04. Hindi na sa Mayo 02 tulad ng pinangako noong 2nd inspection naming. Naisip namin na patas na ito kesa naman, panibagong lingo o buwan o marahil ay taon kaming maghihintay. Pinahintulutan din kaming tignan ito habang isinasaayos.
Kinabukasn, Abril 26, pumunta na kami sa Mandaluyong Main Office para kunin ang Authority to Move In o ATM. Pagkatapos nito kailangang bumalik sa Imus para magtungo sa Engineering Department para sa susi. Sa Main Office, ang nagngangalang Jaymee ang umasikaso sa amin. Ayaw ibigay an gaming ATM sa kadahilanang kailangan pa raw naming magpasa ng mga identification cards (ID’s) at bagong ITR. Nakakapang-init ng ulo!
Una, dahil sabi ni Jaymee, nanghihingi raw ang bangko. Kausap naming ang Metrobank noong Abril 02 sa main office para pumirma ng Letter of Guarantee, pinaghintay kami doon para i-check lahat ng dokumento. Lahat ay wala ng problema, wala sa aming hiningi tapos ngayon kung kalian kukunin na naming ang Authority to Move In, manghihingi sila ng kung anu-ano?
Pangalawa, lahat naipasa na namin at hindi naming kasalanan kung mawala nila ito. Hindi rin namin kasalanan na 2013 lang naaprubahan ang aming loan dahil ibinigay nila sa iba ang aming orihinal na unit na wala naming pahintulot.
Pangatlo, ang layo ng pinanggalingan naming para pabalikin muli nila para sa dokumentong naibigay na.
At ang nakakainit pa ng ulo ng sabihin namin na hindi na kami makakabalik pa dahil may trabaho pa kami at kailangan na naming makuha ang ATM, ang sabi ba naman ni Jaymee “…kami rin may trabaho pa”.
Doon na todong nawala ang aming pasensya at humingi ng manager para kausapin. Gusto pa talaga nilang magwala ka at mag-init ang iyong ulo gaya ng sikat ng araw. At mas lalo pang nakakairita noong tumawag sila sa bangko, wala na raw problema ang aming dokumento at makalipas ang ilang oras na paghihintay, ibinigay din nila ang ATM na noon pa sana nila inasikaso.
Lunes, Abril 29 ng umaga, nagtungo kami sa Engineering Office sa Imus para kunin ang susi. Isang nagngangalang Dudes ang aming naabutan, nanduon din ang secretary/receptionist na si Lea at si Engr. Jorico Dahab. Maayos naman silang makitungo, inabutan namin ang mahabang pila ng mga nagrereklamo dahil sa pag-ulan ng malakas noong Sabado, lahat ng bahay, pinasok ng tubig. Naghintay kami ng kaunti at nalaman naming hindi pa raw na-endorso sa kanila ang susi ng aming unit. Bumalik kami sa CRG, wala si Melai, siya ang nag-asikaso sa amin noong Huwebes pero si Rhoda lang ang nandun, siya ang nakausap namin, hinanap ni Rhoda ang susi, tumawag kung kani-kanino, wala ang susi!!! Pagkalipas ng humigit kumulang isang oras, nasa kontraktor pa raw ang susi… at saan kamo kukuhain? Sa Rizal!
Nakuha rin naman namin ang susi ng aming bahay pagkatapos ng mahigit tatlong oras.